काठमाडौं - कोरोना भाइरस संक्रमित भइ होम आइसोलेसनमा बसेका व्यक्तिलाई रु ५ हजार रुपैयाँ दिन सुरु गरिएको छ । 

नुवाकोटको बेलकोटगढी नगरपालिकाले नगरपालिकाभित्र कोरोना भाइरस सङ्क्रमित भई होम आइसोलेशनमा बसेका व्यक्तिलाई पोषण भत्तास्वरूप उक्त रकम दिन सुरु गरेको हो । 

गत भदौ २९ गते बसेको नगर कार्यपालिकाको बैठकले गरेको निर्णयानुसार कोरोना भाइरस सङ्क्रमित भई होम आइसोलेशनमा बसेका व्यक्तिलाई पोषण भत्तास्वरूप रु। ५ हजार वितरण गर्न थालिएको नगरपालिकाले जनाएको छ । 

कोरोना सङ्क्रमित भएर होम आइसोलेशनमा बसिसकेका १८ जनालाई प्रतिव्यक्ति रु पाँच हजारका दरले उपलब्ध गराइएको जनाइएको छ । 

कोरोना सङ्क्रमितको सङ्ख्या करिब एक हजार हुने अनुमानसहित नगरपालिकाले उनीहरूका लागि पोषण भत्तास्वरूप रु। ५० लाख बजेट विनियोजन गरेको छ । 

अहिलेसम्म नगरपालिकाभित्र कोरोना सङ्क्रमितको सङ्ख्या एकसयको हाराहारीमा रहेको स्वास्थ्य शाखाले जनाएको छ ।