काठमाडौं – नेपालमा डिम्याट खाता खोल्नेको संख्या २५ लाख नाघेको छ । 

हिजो सम्मको तथ्यांक हेर्दा नेपालमा डिम्याट खाता खोल्नेहरुको संख्या २५ लाख ३ सय ४५ पुगेको हो । 

पछिल्लो २ महिना यतामात्रै ३ लाख भन्दा धेरैले नयाँ डिम्याट खाता खोलेका छन् ।

डिम्याट खाता खोल्नेको संख्या हेर्दा हिजोबाट आइपीओ निष्काशन गरेको नेपाल इन्फ्रास्ट्रक्चर बैंक ले नयाँ रेकर्ड राख्ने पक्का देखिएको छ ।

बैंकको सेयर निष्काशन तथा बिक्री प्रवन्धक एनआईबीएल एस क्यापिटलका अनुसार शुक्रबार अपरान्हसम्म करिब ४ अर्ब रकम बराबरको आवेदन प्राप्त भइसकेको छ । 

शुक्रबार अबेरसम्म ३ करोड ८७ लाख ६४ हजार ३८० कित्ताका लागि ३ अर्ब ८७ करोड ६४ लाख ३८ हजार रुपैयाँको आवेदन प्राप्त भएको हो । 

यस अघि आइपीओ जारी गरेको चन्द्रागिरी हिल्सको आइपीओमा १२ लाख ५० हजार हारहारी आवेदकले आवेदन दिएका थिए । 

त्यसपछि पनि निफ्राको शेयरमा आवेदन दिन धेरै आवेदकले डिम्याट खाता खोलीरहेका छन् । जसकारण यस बैंकको आइपीओमा अहिले सम्म कै धेरै आवेदकले आवेदन दिन लगभक पक्का नै छ । 

बैंकले हिजो शरक्रबारबाट ८ अर्ब बराबरको ८ करोड कित्ता शेयर निष्काशन गरेको छ ।